میئر کراچی بیرسٹر مرتضیٰ وہاب نے کہا ہے کہ تمام شاہراہوں سے وال چاکنگ فوری طور پر ختم کی جائے، وال چاکنگ کرنے والوں کو گرفتار کیا جائے تاکہ شہر بدنما نہ لگے۔
انہوں نے مزید کہا کہ مختلف پلوں اور فلائی اوور کے نیچے فلاحی اداروں کی جانب کھانا کھلانے کے دسترخوان کھولے ہوئے ہیں انہیں ختم کیا جائے، شاہراہوں پر موجود تاریخی عمارات کو تحفظ فراہم کیا جائے گا۔
میئر کراچی نے کہا کہ عبداللہ ہارون روڈ پر 16 تاریخی عمارات موجود ہیں، ان سڑکوں پر ایک ہی ڈیزائن کی اسٹریٹ لائٹس نصب کی جائیں،آئی آئی چندریگرروڈ پرمختلف اداروں کے بورڈز ہیں انہیں ڈیجیٹل کرنے کی تجویز ہے،ان شاہراہوں سے کورنوکارپس درختوں کو ختم کیا جائے گا اور کراچی کے روایتی درخت لگائے جائیں گے۔
میئر کراچی مرتضیٰ وہاب صدر دفتر بلدیہ عظمیٰ کراچی میں کراچی بیوٹیفکیشن ٹاسک فورس کے اعلیٰ سطح کے اجلاس کی صدارت کی۔ اجلاس میں آئی آئی چندریگر روڈ، عبداللہ ہارون روڈ، شارع فیصل، شاہراہ پاکستان اور کار ساز روڈ کی بیوٹیفکیشن سے متعلق بریفنگ دی گئی۔
میئر کراچی بیرسٹر مرتضیٰ وہاب نے کہا کہ سوسائٹی قبرستان کی بیرونی دیوار خوبصورت انداز میں تعمیر کی جائے تاکہ سڑک کی دلکشی میں اضافہ ہو،جہاں جہاں سڑکوں پر پیچ ورک کی ضرورت ہے جلد کام شروع کردیا جائے، شہید ملت روڈ اور دیگر مقامات پر فلائی اوور کے نیچے پارکنگ کی اجازت نہیں دی جائے گی۔
انہوں نے کہا کہ شارع فیصل پر شادی ہال کی پارکنگ کو بہتر بنانا ضروری ہے،شارع فیصل کے دونوں اطراف سروس روڈ کو بہتر کیا جائے گا۔
میئر کراچی نے کہا کہ ناتھا خان برج سے ایئرپورٹ تک بیوٹیفکیشن کی ضرورت ہے،آئی آئی چندریگر روڈ پر ریلوے گراؤنڈ میں پارکنگ کی تجویز ہے اس سلسلے میں ریلوے حکام سے بات کی جائے گی،آئی آئی چندریگر روڈ، شارع فیصل، شاہراہ قائدین اور عبداللہ ہارون روڈ پر لٹکی ہوئی تاروں کو کاٹ دیا جائے گا۔
میئر کراچی نے کہاکہ بیوٹی فکیشن ٹاسک فورس میں شامل تمام اراکین میونسپل اداروں کی مدد سے صفائی ستھرائی اور بیوٹی فکیشن کے کاموں کی نگرانی کریں گے۔
