حکومت سندھ کی ہدایت پر شہر بھر میں ٹریفک قوانین کی خلاف ورزیوں کے خلاف جاری کریک ڈاؤن کے دوران ایک ہفتے میں 11,276 موٹر سائیکلیں ضبط کر لی گئی ہیں۔
سینئر وزیر ٹرانسپورٹ و ماس ٹرانزٹ شرجیل انعام میمن نے بتایا کہ فینسی نمبر پلیٹس، کالے شیشے اور گاڑیوں میں غیر قانونی تبدیلیوں پر 831 کارروائیاں کی گئیں، جب کہ ہیوی اور لائٹ ٹرانسپورٹ وہیکلز کی 223 گاڑیاں بھی قبضے میں لی گئی ہیں۔
شرجیل انعام میمن کے مطابق 25 گاڑیوں کی رجسٹریشن منسوخی کی سفارش کی گئی ہے، جبکہ 174 گاڑیوں کی رجسٹریشن عارضی طور پر معطل کر کے انہیں مخصوص شرائط کے تحت ایم وی آئز کے ذریعے چھوڑا گیا۔
انہوں نے واضح کیا کہ یہ کریک ڈاؤن بلا امتیاز جاری رہے گا اور قوانین کی خلاف ورزی پر کسی کو رعایت نہیں دی جائے گی۔
وزیر ٹرانسپورٹ کا کہنا تھا کہ شہریوں کی حفاظت، قانون کی بالادستی اور سڑکوں پر نظم و ضبط کو یقینی بنانے کے لیے تمام دستیاب وسائل بروئے کار لائے جا رہے ہیں۔
بغیر فٹنس سرٹیفکیٹ کے چلنے والی گاڑیاں شہریوں کی جان کے لیے خطرہ ہیں، اس لیے تمام شہریوں سے اپیل ہے کہ قانون کا احترام کرتے ہوئے اپنی گاڑیوں کو مکمل دستاویزات، رجسٹریشن اور فٹنس کے ساتھ سڑک پر لائیں۔
