کستان پیپلز پارٹی کے چیئرمین بلاول بھٹو زرداری نے سانحہِ آرمی پبلک اسکول پشاور کے شہید ہونے والے معصوم بچوں اور اساتذہ کو انکے 11 ویں یوم شہادت پر خراجِ عقیدت پیش کیا ہے۔
میڈیا سیل بلاول ہاؤس کی جانب سے جاری کردہ بیان کے مطابق، چیئرمین بلاول بھٹو زرداری نے کہا کہ اے پی ایس کا سانحہ قوم کے ضمیر پر ایک مندمل نہ ہونے والا زخم ہے اور ایک ایسا اجتماعی غم ہے جس نے دہشت گردی کے خلاف پاکستان کے عزم کو نئی قوت بخشی۔
انہوں نے کہا کہ 16 دسمبر کا دن ہمیں یاد دلاتا ہے کہ دہشت گردی کا نہ کوئی مذہب ہے، نہ انسانیت سے تعلق اور نہ ہی کوئی جواز ہے۔
انہوں نے اپنی بات جاری رکھتے ہوئے کہا کہ دہشتگردی کے خلاف ہمارا جواب ہمیشہ اتحاد، انصاف اور اپنے بچوں کے تحفظ کے غیر متزلزل عزم پر مبنی ہونا چاہیے۔
چیئرمین بلاول بھٹو زرداری نے اپنی جماعت کے امن، تعلیم اور قانون کی حکمرانی کے پختہ عزم کا اعادہ کرتے ہوئے کہا کہ پیپلز پارٹی سانحہ اے پی ایس کے شہدا کے خاندانوں کے شانہ بشانہ کھڑی ہے اور ایک ایسے پاکستان کے لیے جدوجہد جاری رکھے گی جہاں ہر بچہ بغیر خوف کے سیکھ سکے، آگے بڑھ سکے اور خواب دیکھ سکے۔
انہوں نے کہا کہ ہم اے پی ایس کے شہدا کو انتہائی عقیدت کے ساتھ سلام پیش کرتے ہیں۔
ان کی عظیم قربانی ہمیشہ ہمیں ایک محفوظ، مضبوط اور پرامن پاکستان کی راہ دکھاتی رہے گی۔
